Knanaya News‎ > ‎America‎ > ‎

ന്യൂയോര്‍ക്കില്‍ 48 മണിക്കൂറിനുള്ളില്‍ സാന്‍ഡി കൊടുങ്കാറ്റ്: വിമാനങ്ങള്‍ റദ്ദാക്കുന്നു

posted Oct 28, 2012, 8:26 PM by Unknown user   [ updated Oct 30, 2012, 4:10 AM by knanaya news ]
ന്യൂയോര്‍ക്ക്: അടുത്ത 48 മണിക്കൂറിനുള്ളില്‍ ന്യൂയോര്‍ക്കിലും അടുത്ത പ്രദേശങ്ങളിലും ശക്തമായ കാറ്റ് വീശുമെന്ന് കാലാവസ്ഥ കേന്ദ്രം മുന്നറിയിപ്പു നല്‍കി. ജനങ്ങള്‍ ജാഗരൂപരായിരിക്കാന്‍ പ്രത്യേക നിര്‍ദേശമുണ്ട്. മണിക്കൂറുകള്‍ നീണ്ടു നില്‍ക്കുന്ന കാറ്റിനാണ് സാധ്യത. തിങ്കളാഴ്ച ഉച്ചയ്ക്ക് ശേഷമാണ് ശക്തമായ കാറ്റിന് സധ്യത കാണുന്നത്.തെക്ക് കിഴക്കേ ന്യൂയോര്‍ക്ക്,വടക്ക് കിഴക്ക് ന്യൂജേഴ്സി ,തെക്കന്‍ കണക്റ്റികട്ട് എന്നിവിടങ്ങളിലാണ് പ്രധാനമായും കാറ്റിന് സാധ്യത പറയുന്നത്.മണിക്കൂറുകള്‍ കാറ്റ് നീണ്ട് നില്‍ക്കാന്‍ സാധ്യതയുള്ളതിനാല്‍  നഷ്ടം കൂടാന്‍ സാധ്യതയുണ്ട്. അതിനാല്‍ മുന്‍കരുതല്‍ ഉണ്ടായിരക്കണമെന്ന് സര്‍ക്കാര്‍ കേന്ദ്രങ്ങള്‍ സൂചിപ്പിച്ചൂ.തിങ്കളാഴ്ച രാവിലെ മുതല്‍ കാറ്റിന് സധ്യത ഉണ്ടങ്കിലും വൈകിട്ടായിരിക്കും ശക്തമായി വീശുക.

എന്നാല്‍, തിങ്കളാഴ്ച രാത്രിയോടെ സാന്‍ഡി കൊടുങ്കാറ്റ് ന്യൂജഴ്സിയിലും ന്യൂയോര്‍ക്കിലുമെത്തുമെന്ന കാലാവസ്ഥാ പ്രവചനങ്ങളെ തുടര്‍ന്ന് ബ്രിട്ടീഷ് എയര്‍വേയ്സ് അങ്ങോട്ടുള്ള എല്ലാ വിമാനങ്ങളും റദ്ദാക്കി. അമേരിക്കയിലെ കിഴക്കന്‍ മേഖലയിലേക്ക് ഇന്നുള്ള വിമാനങ്ങളും റദ്ദാക്കിയിട്ടുണ്ട്. അമേരിക്കന്‍ എയര്‍ലൈന്‍സ്, ജെറ്റ്ബ്ളൂ, ഡെല്‍റ്റ എന്നീ കമ്പനികളും സര്‍വീസുകള്‍ റദ്ദാക്കിയതായി യാത്രക്കാരെ അറിയിച്ചു. ഇന്നലെയും ഇന്നുമായി ഏകദേശം 6000 ത്തോളം സര്‍വീസുകളാണ് റദ്ദാക്കപ്പെട്ടത്. 

ന്യുയോര്‍ക്ക്, സാന്‍ഫ്രാന്‍സിസ്കോ, ഷിക്കാഗോ എന്നിവിടങ്ങളിലേക്കുളള യാത്രക്കാരെയാണ് വിമാനങ്ങള്‍ റദ്ദാക്കിയത് സാരമായി ബാധിച്ചിരിക്കുന്നത്. കൊടുങ്കാറ്റ് ആഞ്ഞടിക്കാന്‍ സാധ്യതയുണ്ടെന്ന റിപ്പോര്‍ട്ടുകളെ തുടര്‍ന്ന് ജനങ്ങള്‍ പരിഭ്രാന്തരാണ്. വൈദ്യുതി മുടങ്ങിയാല്‍ പുനഃസ്ഥാപിക്കാന്‍ രണ്ടാഴ്ചവരെ എടുക്കുമെന്നാണ് അറിയിപ്പ്. അതുകൊണ്ടു തന്നെ വലിയ തയ്യാറെടുപ്പിലാണ് ജനങ്ങള്‍.

കുടിവെള്ളം കിട്ടാനായി കടകള്‍ക്കു മുന്നില്‍ ഒന്നരമൈല്‍ ക്യൂവാണ് ന്യൂജഴ്സിയില്‍. ജനറേറ്ററുകള്‍ സ്റ്റോക്ക് തീര്‍ന്നു. പെട്രോള്‍ പമ്പുകള്‍ പലതും വരണ്ടു. ജനറേറ്റര്‍ പ്രവര്‍ത്തിക്കാനുള്ള പെട്രോള്‍ എല്ലാവരും വാങ്ങിക്കൂട്ടിയതോടെ പമ്പുകളില്‍ പലതിലും നോ സ്റ്റോക്ക് ബോര്‍ഡായി. 100 വര്‍ഷത്തിനുള്ളില്‍ ഏറ്റവും വലിയ കൊടുങ്കാറ്റ് എന്ന അറിയിപ്പാണ് ജനങ്ങളില്‍ ഭീതിവിതച്ചിരിക്കുന്നത്. പതിനഞ്ചു ദിവസം മുമ്പേ കാലാവസ്ഥ കൃത്യമായി പ്രവചിച്ചിരുന്നു.
Comments