Knanaya News‎ > ‎America‎ > ‎

സകല വിശുദ്ധരുടെയും ഓര്‍മ്മദിനം ആചരിച്ചു

posted Oct 29, 2012, 10:37 PM by knanaya news   [ updated Oct 30, 2012, 2:41 AM ]
ചിക്കാഗോ: സെന്റ് മേരീസ് ക്നാനായ ദേവാലയത്തിലെ മതബോധനസ്കൂളിന്റെ ആഭിമുഖ്യത്തില്‍ സകല വിശുദ്ധരുടെയും ഓര്‍മ്മദിനം വിപുലമായ പരിപാടികളോടെ ആചരിച്ചു. സഭയിലെ വിശുദ്ധര്‍ കാട്ടിത്തന്ന സ്നേഹത്തിന്റെയും സേവനത്തിന്റെയും ത്യാഗത്തിന്റെയും സഹനത്തിന്റെയും ജീവിതദര്‍ശനങ്ങള്‍ മതബോധനസ്കൂളിലെ കുട്ടികള്‍ക്ക് പകര്‍ന്നുനല്‍കുക എന്ന സദുദ്ദേശത്തോടെയാണ് ആണ്ടുതോറും സകലവിശുദ്ധരുടെയും ഓര്‍മ്മദിനം മതബോധന സ്കൂളില്‍ ആചരിച്ചുവരുന്നത്.

ഓരോ ക്ളാസ്സുകള്‍ക്ക് പ്രത്യേകമായി അദ്ധ്യാപകര്‍ നടത്തിയ ക്ളാസ്സുകളും പോസ്റ്റര്‍ പ്രദര്‍ശനവും കുട്ടികള്‍ക്ക് ഏറെ വിജ്ഞാനപ്രദമായിരുന്ന ക്ളാസ്സ് റൂം പഠനങ്ങള്‍ക്കുശേഷം മതബോധന സ്കൂളിലെ അഞ്ഞൂറോളം കുട്ടികളും എണ്‍പത് അദ്ധ്യാപകരും രണ്ട് നിരയായി അണിനിരന്ന് ദേവാലയത്തിലേയ്ക്ക് നടത്തിയ ഓള്‍ സെയിന്റ്സ് ഡേ പരേഡ് വര്‍ണ്ണഭംഗി നിറഞ്ഞതായിരുന്നു. വിശുദ്ധരുടെ വേഷങ്ങള്‍ അണിഞ്ഞ കുട്ടികളും വിശുദ്ധരുടെ ചിത്രങ്ങളും വിശ്വാസവര്‍ഷത്തിന്റെ സന്ദേശങ്ങളും പരേഡിന് മാറ്റുകൂട്ടി. പരരേഡിലുടനീളം വിശുദ്ധരുടെ പ്രാര്‍ത്ഥനാസഹായം യാചിച്ചുകൊണ്ട് അനില്‍ മറ്റത്തില്‍ക്കുന്നേലിന്റെ നേതൃത്വത്തിലുള്ള ഗായകസംഘം ലുത്തിനിയ ഭക്തിസാന്ദ്രമായി ആലപിച്ചു. തുടര്‍ന്ന് വി. കുര്‍ബാനയ്ക്ക് സെന്റ് മേരീസ് പള്ളി അസിസ്റ്റന്റ് വികാരി സിജു മുടക്കോടില്‍ കാര്‍മ്മികത്വം വഹിച്ചു. ലോകത്തിന് നല്ല മാതൃകകള്‍ കാട്ടിത്തന്ന വിശുദ്ധരുടെ ജീവിതങ്ങള്‍ അനുകരിക്കുവാന്‍ ചെറുപ്പം മുതലേ കുട്ടികള്‍ പരിശീലിക്കണമെന്ന് ഫാ. സിജു മുടക്കോടില്‍ വി. കുര്‍ബാനമദ്ധ്യേയുള്ള വചനസന്ദേശത്തില്‍ കുട്ടികളോട് അഭ്യര്‍ത്ഥിച്ചു.

വി. കുര്‍ബാനയ്ക്കുശേഷം അദ്ധ്യാപകരുടെ ദിനാചരണത്തിന്റെ പ്രാധാന്യത്തെപ്പറ്റി കുട്ടികളോട് സംസാരിച്ചു. കുട്ടികളുടെ പ്രതിനിധി ആലീസ് കണ്ണച്ചാംപറമ്പില്‍ ചൊല്ലിക്കൊടുത്ത പ്രതിജ്ഞാ വാചകങ്ങള്‍ കുട്ടികള്‍ ഏറ്റുചൊല്ലി. തുടര്‍ന്ന് വിശുദ്ധരുടെ വേഷങ്ങള്‍ അണിഞ്ഞ കുട്ടികള്‍ക്കെല്ലാംവര്‍ക്കും സമ്മാനങ്ങള്‍ വിതരണം ചെയ്തു. കുട്ടികള്‍ക്കുള്ള മിഠായി വിതരണത്തിന് ജോണിക്കുട്ടി പിള്ളവീട്ടിലിന്റെ നേതൃത്വത്തിലുള്ള മെന്‍സ് മിനിസ്ട്രി അംഗങ്ങള്‍ നേതൃത്വം നല്‍കി. 

ദിനാചരണ പരിപാടികള്‍ക്ക് സ്കൂള്‍ ഡയറക്ടര്‍മാരായ സജി പൂതൃക്കയില്‍, മനീഷ് കൈമൂലയില്‍, സാലി കിഴക്കേക്കുറ്റ്, സി . സേവ്യര്‍, പേരന്റ് വോളന്റിയര്‍മാരായ ജോണ്‍ പാട്ടപ്പതി, സണ്ണി മേലേടം, അദ്ധ്യാപകര്‍ എന്നിവര്‍ നേതൃത്വ നല്‍കി. ദേവാലയത്തിലും സ്കൂളിലും ചര്‍ച്ച് എക്സിക്യൂട്ടീവ് അംഗങ്ങളായ പോള്‍സണ്‍ കുളങ്ങര, ജിനോ കക്കാട്ടില്‍, ജോസ് പിണര്‍കയില്‍, ജയിന്‍ മാക്കില്‍, ജോയിസ് മറ്റത്തിക്കുന്നേല്‍ എന്നിവര്‍ ക്രമീകരണങ്ങള്‍ നടത്തി. വിശുദ്ധരുടെ വേഷങ്ങള്‍ അണിഞ്ഞെത്തിയ കുട്ടികളെയും അവരെ ഒരുക്കിയ മാതാപിതാക്കളെയും സകല വിശുദ്ധരുടെയും ദിനാചരണം ഏറ്റവും ഭംഗിയാക്കിയ അദ്ധ്യാപകരെയും വികാരി ഫാ. എബ്രാഹം മുത്തോലത്ത് അഭിനന്ദിച്ചു.

ജയിന്‍ മാക്കില്‍
Comments